免撼親頭、彈胸、冧門！在家運動必要注意8大安全事

撰文：Ethan Wong｜圖片：網上圖片

近日在網上就有人整合咗在家運動失敗或發生意外嘅影片合輯，小編睇見都feel到忍忍作痛！

睇完係咪驚驚？唔敢再在家運動？其實又唔使，只要常注意以下幾點，在家運動就可以安全得多：

1. 必做足熱身

其實做任何運動都係要熱身的，無論係靜態或動態熱身，都建議大家預留5~10分鐘warm-up。可以是簡單嘅提腿，又或是手部擺動，主要係令你身體熱起來，有點快要流汗嘅感覺，那進入正式workout時，就可以減少扭傷筋腱。

2. 器材使用幅度

片中好多意外都是由運動器材造成，所以使用該器材前，最好先預計好workout時所會觸及嘅範圍，例如啞鈴孤度，一唔小心，就好容易撞爆你屋企啲靚靚傢俬或者擺設。

3. 檢查運動器材

利用運動器材如啞鈴或彈力帶前，最緊要check清楚器材嘅各部位是否已鎖好，如啞鈴嘅「餅」、彈力帶有冇老化／接近斷裂邊緣等等，花少少時間檢查清楚，就可減低意外發生。

4. 穩妥器材連接位

如要在家中使用牽涉入牆位或連接位嘅運動器材，就要份外小心。好似TRX呢啲，事先要檢查清楚牆身或家居連接位嘅承受力、連接位狀態（是否有鬆脫現象或已安全地安裝配好）、附近嘅傢具會否於workout時郁動到、脫落而造成意外等，都要double check！

5. 要量力而為

由於在家運動一般冇PT（私人教練）在旁，又或者係睇住YouTube跟做，做到一時興起，可能會超過自己能力負荷範圍，輕則拉傷筋腱，重則可能會有生命危險！所以如果大家做做下發覺有頭暈、呼吸唔到等跡象，就要即刻停止，唔好死頂！

6. 小心寵物細路

在家運動時，如附近有小孩或貓狗寵物，就要分外小心，因為佢地通常好奇心極重，唔知你做緊乜嘅時候，就會有可能忽然接近你想參與你嘅活動，如果你做緊嘅一啲重型動作，發生突發碰撞時，就有機會釀成較嚴重意外㗎。

7. 家運後都要拉筋

同一般室內外運動一樣，就算在家運動，都唔能夠輕視，做完之後都要拉筋，主要功能當然係加速身體排除乳酸等運動後廢物，快速消除疲勞，促進肌體快啲recover；如果第2日唔會太疲倦、筋骨有酸痛，咁咪可以繼續在家運動囉！

8. 運動後食好嘢

呢個對於大部分人嚟講，可能係在家運動最期待嘅reward moment！一般可以喺運動後30分鐘內進食，並且以碳水化合物同蛋白質食物為主，呢類食物能夠有效幫助身體運動後修復，正呀！

咁提咗你8點在家運動注意事項，希望大家做得開心又安全，最好梗係，疫情快啲過，大家又可以出番去室外做運動啦！

📣訂閱SSwagger TG頻道，接收抽鞋、潮流最快消息➡️https://t.me/sswagger