jordan 紀錄片 web

冇Jordan紀錄片睇 唔怕!推介人生必睇10套Netflix運動片

點解咁唔公平?點解香港暫時未有得睇Michael Jordan套紀錄片呀?大家都好嬲,所以我化悲憤為「睇力」,搵咗必睇10套Netflix運動片俾大家,水準都好強,真心好睇,有套更係改變咗好多本地運動愛好者嘅飲食習慣。煲晒佢,冇Jordan睇都包唔會空虛!

撰文:SSW編輯部|圖片來源:網上圖片

.

套套熱血又唔悶 唔睇冇話題

1)《茹素的力量》(The Game Changers)食素爆肌 (IMDB:7.9) 立即收看

一直以嚟,個世界都係話俾我哋知:食肉=有氣有力,食素=冇氣力,原來係錯!呢套紀錄片就話俾大家知,原來世界好多頂尖運動員,好似田徑名將劉易斯、英國賽車手「黑帝」咸美頓、網球名將「細威」莎蓮娜威廉斯、祖高域等人都係純素食者(根據維基百科定義,純素:避免食用所有由動物製成嘅食品,例如蛋、奶類等),此片監製更加係星光熠熠:占士金馬倫、阿諾舒華辛力加等。你睇咗未?

Jordan紀錄片

2)《英倫遊戲間》(The English Game)足球改變世界 (IMDB:7.7) 立即收看

全球冇波睇,所以網上好多朋友都力推呢套由《唐頓莊園》編劇Julian Fellowes創作。將英國足球起源故事改編得振奮人心,講述足球點樣由英國上流社會嘅運動變成影響全國,令到各地工人組球隊比賽,大家點樣用足球打破社會階級觀念,進而成為全民運動,熱血嘢!重點全數6集,好易消化!

3)《伊卡洛斯》(Icarus)俄國禁藥風暴 (IMDB:7.9) 立即收看

本身導演Bryan Fogel只係想拍低自己點樣可以避過藥檢,服用禁藥參與業餘單車賽事,結果卻意外拍出一套見證國際體壇醜聞、彷似「諜戰」嘅寫實驚悚電影。揭露俄羅斯有國家機制俾運動員使用禁藥,揭露現行嘅運動員藥檢制度形同虛設,只要有相當知識同能力,就可瞞天過海。此片更喺第90屆奧斯卡金像獎中獲得「最佳紀錄片」獎。

.

4)《Formula 1》(一級方程式:極速求生)唔識揸車都睇到熱血 (IMDB:8.6) 立即收看

2019年第1季推出後大受歡迎,2020年即推出第2季,熱血程度有增冇減,就算你冇車牌或根本連賽車都未睇過,唔緊要!此紀錄片一樣可以睇到大家手心冒汗、心跳加速,除咗車手之間嘅鬥爭好似《權力遊戲》咁好睇外,重有大量第一身視點鏡頭,所以唔識車都會覺得刺激。未睇第1季?唔緊要,是但開一集睇都得,推介大家可跳睇第2季第4集,好精采!

5) 《惡名昭彰》(Conor McGregor: Notorious)寸嘴拳王如何成功 (IMDB:7.2) 立即收看

寸嘴拳王McGregor相信大家總會喺新聞見過佢,此片講佢點樣由一個無名小子變成UFC(終極格鬥冠軍賽)不可或缺嘅搖錢樹?點樣成為愛爾蘭嘅國民英雄?今年31歲嘅McGregor,所經歷嘅嘢已經夠晒戲劇化,所以又係既熱血又好睇!

冇Jordan?重有好多籃球紀錄片!

6) 《The Carter Effect》 (IMDB:7.1) 立即收看

今年43歲嘅Carter本身於今個賽季後退休,但疫情令到NBA復賽無期,亦可能令Carter被迫退休。可能大家對佢嘅印象都係入樽怪物,其實佢對多倫多速龍隊,以至整個加拿大籃球發展都影響深遠。睇下呢套紀錄片你就會知得一清二楚。

.

7) 《籃前欄後》(Q Ball)KD監製籃球影響生命 (IMDB:6.8) 立即收看

由KD(Kevin Durant)監制,講美國San Quentin State Prison聖昆丁州立監獄中,一班罪犯藉由打籃球尋求救贖同彼此間建立起深厚感情,一聽就知係感人嘢!

8) 《輸家輸得起》(Losers)學習接受輸 (IMDB:7.7) 立即收看

森美都推介過嘅紀錄片,一共分8個獨立故事,講述溜冰、拳擊、足球、冰壺、馬拉松、狗拉雪橇、街頭籃球同哥爾夫球等不同領域嘅運動員,點樣面對失敗後重新振作。有時運動唔係企喺第1就代表贏,過程中有好多體會,其實你都可以學會輸住咁贏!

加推2套男人必睇運動電影

9) 《一級雙雄》(Rush)最好睇賽車電影 (IMDB:8.1) 立即收看

編輯部認為係最好睇嘅賽車電影,大導演Ron Howard繼《擊動深情》(Cinderella Man)後再次拍真人真事改篇嘅運動題材電影。故事講由賽車兩雄惺惺相惜嘅競爭中,道出不少人生道理,亦將名利得失看至另一層次,戲入面嗰種男人的浪漫,睇過你就明。

10)《 魔球》(Moneyball)畢佬感人之作 (IMDB:7.6) 立即收看

一套滄海遺珠,講陷入人生低潮嘅Brad Pitt,點樣孤獨作戰對抗主流價值,堅持利用數據分析去令一隊零球星、全世界都唔睇好嘅球隊成功,最後,球隊真係打出21連勝紀錄,令全世界跌爛晒眼鏡,更改變日後美國聯盟嘅生態。

📣訂閱SSwagger TG頻道,接收抽鞋、潮流最快消息➡️https://t.me/sswagger

SS推介你感興趣...