機鞋大對決 web

機鞋大對決!Air Force 1「PlayStation」vs Air Jordan 1「Xbox」

平時有打機習慣的朋友,相信對PlayStation或是Xbox系列的遊戲機絕不陌生,而應該大部分香港電玩迷都偏向玩PlayStation遊戲機較多。不過,如果兩款遊戲機品牌都變成波鞋,你又會揀着邊對呢?睇更多NIKE鞋款:NIKE.com

編輯:Chim丨圖片來源:NIKE、Xbox

.

超型冰藍剔 Air Force 1「PlayStation」

有留意開波鞋資訊動向的朋友,肯定記得年頭時推出的PG 2「PlayStation」,當時一出就即刻賣斷市然後炒價出現,因為實在太靚喇,特別是鞋舌位識發光的PS logo,睇到流晒口水。而NIKE又再與PlayStation攜手合作,繼2006年聯乘推出的AF 1「PS3」後,今次就迎來黑面藍剔的Air Force 1「PlayStation」。

鞋身採用黑色磨砂皮革、白色中底和半透明的冰藍色啫喱底,至於Swoosh logo就利用了PlayStation藍色格調,左右後踭則分別以PlayStation logo和手掣的4個招牌式按鍵符號示人。細節位加入了電鍍效果使吸睛度馬上大增,而且Swoosh logo上亦有若隱若現「神秘圖案」(無錯,又是4個按鍵符號圖案)。當時「PS3」配色只得150對公開發售,不知道今次又有幾多對可以給大家機迷入手呢?

.

機界綠巨人 Air Jordan 1「Xbox」

可能現時PlayStation玩家特別多,但曾經何時Xbox是遊戲機界的「龍頭大佬」,一見到黑綠色就自然聯想起它。今次Xbox就找來Jordan Brand合作,以AJ迷最愛的Air Jordan 1作設計藍本,打造出有夜光效果的Air Jordan 1「Xbox」。

黑綠招牌Xbox色的Air Jordan 1採用優質絨面革製成,鞋上就印有Xbox 及 Jumpman logo,鞋帶更設有灰色、黑色、深綠色及淺綠色 4 種不同顏色作換襯,每條鞋帶都印上了「Xbox」字樣。而當中最大賣點,當然是螢光綠的鞋底能在黑暗中發光,簡直是見住Xbox開機畫面般一樣,好正!暫時未知這對AJ 1的公開發售詳情,作為Xbox死忠當然不會放過它啦,但你是PlayStation機迷兼AJ迷的雙重身份,會考慮「轉會」嗎?

相關文章:

世盃狂熱來襲!Nike Football Hub 登陸旺角T.O.P. 期間限定 FTBL Studio 免費印波衫

【勇士獨有】專屬冠軍配色Epic React Flyknit 全球限量37雙

SS推介你感興趣...